ရေညှိတွေနဲ့လှေကားတစ်(၄) (သို့) အိပ်မက်တစ်ခုကောက်ရခြင်း

စိုင်းပထမနှစ်ရဲ့ ပထမနှစ်ဝက် ပြီးတော့ မျက်ဝန်းချိုက စိုင်းတက်နေတဲ့ ကျောင်းကိုလာတက်ဖြစ်တယ်လေ။ စိုင်းအရမ်းပျော်ခဲ့ရတာပေါ့။ ပထမနှစ်ဝက်တုန်းက မှန်မှန်မရောက်တဲ့ကျောင်းကို တစ်ရက်လေးမှအပျက်မခံ ဖြစ်ခဲ့ဘူးလေ။ အတန်းကတော့ မှန်ချင်မှမှန်တာပေါ့လေ။ ကျောင်းကျဉ်းကျဉ်းလေးက မြက်ခင်းစိမ်းစိမ်းလေတွေမှာ ကဗျာစာအုပ်တွေပြည့်လို့ တိုက်စားသွားခဲ့တဲ့ အချိန်တွေကို Back Up လုပ်ထားချင်ခဲ့တာ။

အတန်းတက် ကန်တင်းထိုင်တာကလွဲရင် စာသင်ခန်းနဲ့ဝေးတဲ့ မြက်ခင်းစိမ်းလေးတစ်နေရာမှာ သူရယ်၊ စိုင်းရယ် ကဗျာတွေဖတ်လိုက်၊ စာတွေကျက်လိုက်ပေါ့။ တခါတလေ ဂစ်တာတစ်လက်နဲ့ စိုင်းရေးတဲ့သီချင်းတွေ ဆိုကြည့်ကြတယ်လေ။ စိုင်းရင်ခွင်ထဲက မျက်ဝန်းချိုပေးတဲ့ ဂစ်တာလေးကထွက်တဲ့ သံစဉ်ရယ်၊ စိုင်းကိုယ်တိုင်ရေးပြီး မျက်ဝန်းချိုသီဆိုနေတဲ့ သီချင်းရယ် ပေါင်းစပ်ထားတဲ့ အနုပညာတစ်ခု။ သူများတွေအတွက်တော့ မပြောတတ်။ ဒါကိုကျောင်းသားဘဝလို့ ပြောတာလားမသိ။ အခုခေတ်မှာမရနိုင်ပါဘူးဆိုတဲ့ တက္ကသိုလ်ကျောင်းသားဘဝကို တကယ်ရခဲ့တယ်ဆိုရင်ယုံမလား။ ကျောင်းတော်ကြီးရဲ့ နွေးထွေးမှုအောက်မှာ တက္ကသိုလ်ကျောင်းသားဘဝ ဆိုတာကြီးကို မြိန်ရည်ရှက်ရည်ခံစားလို့ စိုင်းတစ်ယောက် ပထမနှစ်ကုန်ဆုံးလို့ ဒုတိယနှစ်ရောက်ခဲ့ပြီလေ။မျက်ဝန်းချိုကတော့ ပထမနှစ်ရဲ့ ဒုတိယနှစ်ဝက်တက်ရမှာပေါ့လေ။

ဝါသနာအရဖွဲ့စည်းကြတဲ့ ဘောလုံးအသင်းမှာ ပါဝင်တဲ့စိုင်းရဲ့ ပွဲစဉ်တိုင်းကို ရေဗူးလေးဆွဲလို့ လိုက်လိုက်ကြည့်တတ်တဲ့ မျက်ဝန်းချို၊ M3 သွားလို့ သီချင်းဆိုရင် ခေါင်းလေးတခါခါ အမူအရာအပြည့်နဲ့ ကျကျနနသီဆိုတတ်တဲ့ မျက်ဝန်းချို၊ ကန်ဘောင်ရောက်တိုင်း ရခိုင်မုန့်တီကလွဲရင် ဘာမှမှာတဲ့ မျက်ဝန်းချို၊ စိုင်းအတန်တန်ပြောတဲ့ကြားက စာသင်ချိန်တွေဖျက်ဖျက်ပြီး Shopping ထွက်ချင်တဲ့ မျက်ဝန်းချို၊ သူ့ဆီက စိုင်းအလိုချင်ဆုံးစကားကို ဒုတိယနှစ်အစပိုင်းလေးမှာပဲ ကြားခဲ့ရပါတယ်။ စိုင်းအရမ်းကိုပျော်ခဲ့ရတယ်။ စိုင်းနှလုံးသားလည်း ပျော်ပါလိမ့်မယ်။ မြတ်မြတ်နိုးနိုး ချစ်နေသော သူတစ်ယောက်ဆီက အချစ်။ အဲဒီနေ့က ကဗျာတစ်ပုဒ်ချရေးမိတယ်။

စိုက်ပျိုးခဲ့ဖူးတယ်
ငါ့အိပ်မက်တွေ
တပ်မက်ဖူးတယ်
မင်းအိပ်မက်တွေ
ခူးပေးဦးမယ်
မင်းအိပ်မက်အတွက် ကုန်ကြမ်း
ရူးသွပ်ဦးမယ်
မင်း ပွင့်ဖူးတဲ့ ငါ့ရဲ့အိပ်မက်
တောင့်တချင်တယ်
မင်းအိပ်မက်ရဲ့နေရာတစ်ခု
အိပ်မက်ကတော့လန့်မနိုးပါနဲ့……။
ဒီလိုနဲ့ သူနဲ့စိုင်း တော်တော်လေးချစ်ခဲ့ပါတယ်။ လူကြားထဲမှာလက်အကိုင်မခံ တာကလွဲရင်ပေါ့။

ဆက်လက်ဖတ်ရှုပေးပါနော်………။
ရေညှိတွေနဲ့လှေကားတစ်(၁) (သို့) မိုးရွာထဲကမျက်ဝန်းချို
ရေညှိတွေနဲ့လှေကားတစ်(၂) (သို့) အတွေးတချို့နှစ်ကခုန်မိခြင်း
ရေညှိတွေနဲ့လှေကားတစ်(၃) (သို့) ဘ၀တစ်ခု ပျိုးထောင်ခြင်း
ရေညှိတွေနဲ့လှေကားတစ်(၄) (သို့) အိပ်မက်တစ်ခုကောက်ရခြင်း
ရေညှိတွေနဲ့လှေကားတစ်(၅) (သို့) တည်ဆောက်ခဲ့တဲ့ ငြမ်းတစ်ခု
ရေညှိတွေနဲ့လှေကားတစ်(၆) (သို့) လှေကားထစ်တစ်ခုရဲ့လက်ခုပ်သံ

No comments: