ခြေလှမ်း

ရွှေတွင်းလား သေတွင်းလား
ရှေ့တိုးရမှာလား နောက်ဆုတ်ရမှာလား
အဖေကပြောတယ် သတ္တိရှိပါတဲ့
အမေကပြောတယ် သတိရှိပါတဲ့
တွန့်ဆုတ်နေတော့ ခရီးမရောက်
ရဲတင်းပြန်တော့ ထောင်ချောက်မိသတဲ့
ဖောင်ဖျက်တိုင်းလည်း မနိုင်ပေမယ့်
ဘုရင့်နောင်က သက်သေပြခဲ့ပြီလေ
မုဆိုးလုပ်တိုင်းကော သားကောင်မဖြစ်တော့ဘူးလား
သိပ်တော့မထူးလှပါဘူး
လက်ဦးမှုကသာ တရားသူကြီး
ဒီပွဲမှာ ဘက်လိုက်မှုတွေတော့ မရှိဘူး
ပြေးရင်းနဲ့လိုက်၊ လိုက်ရင်းနဲ့ပြေး
နိုင်မလိုနဲ့ရှုံး ရှုံးမလိုနဲ့နိုင်
ပြုံးမလိုလိုနဲ့လည်း မှိုင်ခဲ့လေရဲ့
မျက်ရည်တွေကော ရယ်သံတွေပါ ငါခလုတ်တိုက်ခဲ့ပြီလေ
သာယာမှုတွေကို အလိုလိုက်
ခနဲ့ပြုံးတွေကိုလည်း မျက်စောင်းထိုးခဲ့သေးတယ်
တကယ်တော့ ငါကိုယ်တိုင်လည်း အညှီနံ့ မကင်းပါဘူး
ငါ့လောဘကြောင့် ငါဆုံးရှုံး
ငါ့ဒေါသကြောင့် ငါမှားယွင်း
ငါ့မောဟကြောင့် ငါပျက်သုံးခဲ့ပြီးပြီ
ဘာပဲဖြစ်ဖြစ်တော့ ဒီခြေလှမ်းကို ဆက်လှမ်းနေဦးမှာပဲ
ငါ့အတ္တနဲ့ ငါကိုး။

ဗီလိန်