ဗီလိန်ရဲ့ အိပ်ရာ: ဗီလိန် ရဲ့ ဗီလိန်ဆိုတာ

ဝလုံးလေးမှ ဝိုင်းအောင် မရေးနိုင်ခင် ရွှေလင်ဗန်းနဲ့ ထမင်းဆီဆမ်းရယ်
အမေဆိုပြလိုက်တော့ ရွှေသားအတိပြီးတဲ့ လင်ဗန်းကြီးပဲ မက်မောကာ
ငါဟာ လောဘ တက်လာတယ်..........

ပုခက်တွင်းမှဆင်း မြေကြီးပေါ်နင်းကာစ ရွှေယုန်လေးနဲ့ ရွှေကျားပုံပြင်ရယ်
အင်မတန်ကောက်ကျစ်တဲ့ ယုန်ဆိုးလေးကို သိပ်ပြီး အားကျနေခဲ့တော့
ငါဟာ ကောက်ကျစ်တတ်လာတယ်..........

မျက်လုံးကတစ်ဖက် ကန်းနေခဲပါရက်နဲ့ ဘုရင်ကိုဖမ်းပြီး အကျဉ်းချဝံ့သူ
ငရမန်ကန်းကြီးအား အရမ်းဂုဏ်ပြုမိတော့ တို့ကျောင်းက သမိုင်းဆရာလေးတောင်
လူပေလေးလို့ ငါ့ကိုခေါ်..........

ဘိုင်စကုပ်ကြည့်တော့ လူကြမ်းကို အံ့ကျော်ကို အလွန်တရာ နှစ်သက်တတ်ခဲ့တယ်
ငါ့နံဘေးက ချစ်သူလေးကတောင် တဖြည်းဖြည်း ငါ့ကိုလန့်ကာ
ကြင်နာတတ်မယ့်တစ်ယောက်ကို ရှာ..........

ဒီလိုနဲ့ ဆန့်ကျင်ဘက်အမြင်တွေကို သုံးသပ်ရင်း လူတွေအပေါ်
ဘယ်သူက မှားပြီး မှန်တယ်လို့..... ဆုံးဖြတ်ခက်လာတယ်.....

အဆိုးနဲ့အကောင်း တွဲနေတတ်တာကို မြင်နိုင်ဖို့ လေ့ကျင့်ခဲ့တယ်
ဒီအတွက် အကျိုးအမြတ်က အများတကာ မေးငေါ့ကာ
အမြင်ကတ်လို့ မုန်းစရာဖြစ်ကာ ငါဟာ အရိုင်းအစိုင်းဖြစ်မြင်လာ..........

ငယ်ငယ်လေးထဲက ပါးစပ်ထဲမှာ စွဲနေခဲ့ဖူးတဲ့ သီချင်းလေးပါ။ ကြိုက်လွန်းလို့ ကျနော့ အိပ်ရာကို လာလည်သူတွေ အားလုံးကို ဒီသီချင်းလေးနဲ့ ဖျော်ဖြေခဲ့တယ်။ နားငြီးလို့ ထွက်ပြေးကြတဲ့သူတွေ လည်း ရှိကောင်းရှိလိမ့်မပေါ့ဗျာ။ ကျနော့ ဘဝက လည်း ဒီသီချင်းလေးနဲ့ ဆင်တူခဲ့တာကိုး။ တကယ်တော့ အဆိုးအကောင်း၊ အမှားအမှန်ဆိုတာ ရီလေတီဗတီ သီအိုရီအရ ချိန်ခွင်တစ်ခုတည်းပေါ်က အရာ နှစ်ခုပဲဆိုတာ ၂၀ရာစု အထူးချွန်ဆုံး သိပ္ပံပညာရှင် အိုင်းစတိုင်းရဲ့ ကျေးဇူးနဲ့ သိခွင့်ရခဲ့တယ်လေ။ ဒါကြောင့်လည်း အရာရာကို တစ်ဘက်က လှည့်တွေးရင်း တွေးရင်နဲ့ လူတကာမုန်းတဲ့ ဗီလိန်ဆိုတာကို ချစ်ခဲ့မိတာပေါ့။

ဗီလိန်တို့၏ အဆိုအမိန့်များ ပို့စ်မှာ အမည်မသိ စာဖတ်သူတစ်ဦးက မေးသွားပါတယ်။ ဗီလိန်ကို ဘယ်လို အနက်ဖွင့်သလဲ။ အဘိဓာန်တွေ တော်တော်များများမှာတော့ ရေးထားပါတယ်။ အချို့ အဘိဓာန်တွေမှာတော့ မတွေ့ရပါဘူး။ အကြမ်းဖျင်းအားဖြင့် ဗီလိန် (Villain) ကို လူဆိုး၊ အမှားဘက်ကလူ လို့ အနက်ဖွင့်ကြပါတယ်။ ဒါပေမယ့် ကျနော် ကျေနပ်လောက်တဲ့ အနက်ဖွင့်ပေးတဲ့ အဘိဓာန် ရှာမတွေ့သေးပါဘူး။ ဒီစကားလုံးရဲ့ နောက်ကွယ်မှာ ကျနော် ဗီလိန် ကိုယ်တိုင်မသိတဲ့ အနက်တချို့ရှိနေသလိုပဲလို့ ခံစားရတယ်။ (ဒါကတော့ ကိုယ်ပိုင်ခံစားချက် သက်သက်ပါ။) အဘိဓာန်မှာ ဖွင့်သလို မှားတဲ့လူမှ ဗီလိန်လား ဆိုတာ စဉ်းစားစရာပါ။ တချို့နေရာမှာ မှန်နေတဲ့ ဗီလိန်တွေလည်း အများကြီးပါ။ ဒါဆို ဗီလိန်တိုင်းကကော အမှန်တရားတွေ ရှိသလား။ မရှိပါဘူး။ ကျနော် ခံယူသလောက်ကတော့ လူတစ်ယောက်က ဘယ်လောက်ပဲ မကောင်းဘူး ဖြစ်နေပါစေ ကောင်းတာတွေကတော့ ရှိစမြဲပါ။ ကောင်းပါတယ်ဆိုတဲ့ သူတွေကကော ဘယ်လောက်များ ပြည့်စုံနေပါ့မလဲ။

အနုပညာနဲ့ ပတ်သတ်လို့လည်း ငယ်ငယ်က ဇာတ်ပွဲတစ်ပွဲ သွားကြည့်တုန်းကပေါ့။ ဗီလိန်သရုပ်ဆောင်ကောင်းတဲ့ ဇာတ်သမားကတဲ့ ဇာတ်ကွက်ကို မျက်စိမပိတ်တမ်းကြည့်ကာ အားကျခဲ့ဖူးသည်။ ထိုညက ပရိသတ်က ထိုဇာတ်သမားကို ခဲနဲ့ လှမ်းထုတာ ဇာတ်ပွဲ ပျက်သွားပါတယ်။ ဒီဇာတ်သမားနေရာမှာ ကျနော်ဆိုရင် တော်တော်ပျော်မိမှာပဲ။ ကိုယ့်အနုပညာ ဘယ်လောက်ပြောင်မြောက်တယ် ဆိုတာကို ဂုဏ်ယူနေမိမှာ သေချာတယ်။ ဟိုအရင်က ကျနော်တို့ ငယ်ငယ်အထိတောင် ရှိတုန်းဖြစ်တဲ့ ဗီလိန်နေရာက အနုပညာသည်တွေဆိုရင် အသေမုန်းတတ်တဲ့ အကျင့်တွေကြောင့် ဗီလိန်အနုပညာသည်တွေဟာ တော်တော်ကို ကျားကုတ်ကျားခဲ ကြိုးစားကြရရှာပါတယ်။ ကျနော်လို လူတွေ များလာလို့လားတော့ မသိဘူး။ ခုဆို ဗီလိန်တွေ တော်တော် နေရာရလာပါပြီ။ ဗီလိန် သရုပ်ဆောင် အမေကြီး ဒေါ်ခင်အေးဟန် ဆိုရင်လည်း ကျနော် အကြိုက်ဆုံးပါ။ အပြင်မှာ စိတ်ထားဖြူစင်သလောက် သူသရုပ်ဆောင်တဲ့ နေရာတိုင်းမှာ ကောက်ကျစ်ယုတ်မာ စဉ်းလဲသူ တစ်ယောက်အဖြစ် ဗီလိန်တွေရဲ့ ဘက်ကနေ မားမားမတ်မတ်၊ ပိုင်ပိုင်နိုင်နိုင် သရုပ်ဆောင် နိုင်ခဲ့သူပါ။

လူသိများတဲ့ ဒေဝဒတ် ဆိုတဲ့ ဗီလိန်တစ်ယောက် အကြောင်း ပြောကြပါစို့။ သူအခုဘယ်မှာလဲ ဆိုတာ အားလုံးလည်း သိပြီးဖြစ်မှာပါ။ ဟုတ်ပါတယ်။ ငရဲကြီး ရှစ်ထပ်က အဆိုးဝါးဆုံး ဖြစ်တဲ့ အဝီစိငရဲမှာ သူ့ရဲ့ မိုက်ပစ်တွေကို ဆေးကြောနေပါတယ်။ ဒါဆို သူဟာ ဗီလိန်တစ်ယောက် ဆိုတာသေချာသွားပြီ။ သူလုပ်ခဲ့တဲ့ မကောင်းမှုတွေ၊ သူပြုခဲ့တဲ့ အကုသိုလ်ကံတွေ၊ သူပြစ်မှားခဲ့တဲ့ အရာတွေအကြောင်းကို ပြောပြရရင် တစ်နှစ်ကို ၃၆၅ ပုဒ်ပြောခဲ့ဖူးတဲ့ အမေ့ရဲ့ အိပ်ရာဝင်ပုံပြင်တွေ အားလုံးနီးပါး ဖြစ်နေပါလိမ့်မယ်။ ဒါဆို သူ့မှာ ကောင်းကွက်လေးတစ်ခုမှ မရှိတော့ဘူးလား။ ဒီမေးခွန်းအတွက် ကျနော်က ပြန်မေးရပါလိမ့်မယ်။ ဒေဝဒတ်ကို ကောင်းကွက်မရှိဘူး မှန်ရင် ငရဲသက်စေ့ရင် ဘာကြောင့်များ ပစ္စေကဗုဒ္ဓ ဖြစ်ရမှာလဲ။
"နတ်တကာတို့ထက် မြတ်တော်မူထသော၊ လူ-နတ်-ဗြဟ္မာ သတ္တ၀ါအပေါင်းကို ယဉ်ကျေးအောင် ဆုံးမတော်မူတတ်သော၊ သဗ္ဗညုတဥာဏ်တော်နှင့် ပြည့်စုံတော်မူသော၊ အရာမကသော ကုသိုလ်တော်တို့ကြောင့် ဘုန်းလက္ခဏာနှင့် ပြည့်စုံတော်မူထသော၊ လောကတွင် အမြတ်ဆုံးဖြစ်တော်မူသော ထိုမြတ်စွာဘုရားကို အကျွန်ုပ်သည် ဤအရိုးတို့ဖြင့်လည်းကောင်း၊ ဤကျန်ရှိနေသေးသော အသက်တို့ဖြင့်လည်းကောင်း ကိုးကွယ်ရာဟူ၍ ဆည်းကပ်ပါ၏။ "
ဒီစကားလေးက ဒေဝဒတ် နောက်ဆုံးထွက်သက်မှာ ပြောခဲ့တဲ့ စကားလေးပါ။ အမှားကို အမှားမှန်း သိလို့ မြတ်စွာဘုရားကို နောက်ဆုံး တောင်းပန် ကန်တော့သွားတဲ့ စကားလေးပါ။ ဆရာတော် ဥူးသုမင်္ဂလ ဆုံးမဖူးတဲ့ စကားလေးတစ်ခွန်း ရှိပါတယ်။ အမှားကို အမှားမှန်း သိရက်နဲ့ မှားတဲ့လူနဲ့ မသိပဲ မှားတဲ့ သူနဲ့ ဘယ်ဟာကောင်းသလဲ။ ဆရာတော်ကတော့ ဒီလိုဆုံးမပါတယ်။ မှားတာက မှားတာပဲ။ မသိလို့ မှားတာပဲ ဖြစ်ဖြစ် သိရက်နဲ့ မှားတာပဲဖြစ်ဖြစ် အပြစ်ကတော့ အတူတူပဲ။ ဒါပေမယ့် သိရက်နဲ့ မှားတဲ့သူက မှားမှန်းသိတဲ့အတွက် အကြောင်းတိုက်ဆိုင်ရင် ပြင်ဆင်ခွင့်ရမယ်။ မသိလို့ မှားတဲ့သူက အဆုံးမရှိ ထပ်မှားနေဦးမယ် ဒါကြောင့် ကိုယ့်အမှားကိုယ်သိပြီး ပြင်နိုင်အောင် ကြိုးစားပါလို့ ဆုံးမပါတယ်။ ဒေဝဒတ်က ဒီလိုပါပဲ။ မကောင်းမှုတွေများခဲ့ပေမယ့် တချိန်က ဘုရားဖြစ်ဖို့ ပါရမီ ဖြည့်ခဲ့ပြီးသား။ နောက်တစ်ခုက ဂေါတမ မြတ်စွာဘုရားရှင်ကိုလည်း တဘက်ကနေ ပါရမီ ဖြည့်ပေးခဲ့တယ်လေ။ နောက်ပြီး သူ့ရဲ့ နောက်ဆုံးအချိန်မှာ သူပြုခဲ့ မကောင်းမှုအတွက် သူပြစ်မှားခဲ့တဲ့ ဘုရားရှင်ကို ကိုယ်တိုင်ကိုယ်ကျ တောင်းပန်ခွင့်ရခဲ့တယ်။ နောက်ပြီး သူပြုခဲ့သမျှ မကောင်းမှုကံတွေကို ငရဲမှာ နှစ်ပေါင်းများစွာ ခံပြီး အကြေချေနေပါပြီ။ ငရဲကလွတ်တာနဲ့ ပစ္စေကဗုဒ္ဓ ဖြစ်မယ်လို့ ကျမ်းဂန်က ဆိုပါတယ်။

ဒီတော့ဗျာ။ ဗီလိန် ဆိုတာကို ကျနော်ကတော့ ဗီလိန်လို့ပဲ သတ်မှတ်လိုက်တယ်။ ဒီစကားမျိုး ကျနော်ပြောဖူးပါတယ်။ အချစ်ရဲ့ အနက်ကို ဖွင့်ခဲ့တုန်းကပေါ့။ အချစ်ဆိုတာကို အချစ်လို့ ဖွဲ့ဆိုတဲ့စကားလုံးလောက် ပြည့်ဝတဲ့ စကားလုံးမရှိမသလိုပဲ။ ဗီလိန် ဆိုတဲ့ စကားလုံးကို ဗီလိန် ဆိုတာထက် ပြည့်စုံ လှပတဲ့ စကားလုံး ရွေးလို့ မရဘူးလို့ ကျနော်ကတော့ ခံယူပါတယ်။ တဘက်က ဗီလိန်ဖြစ်နေပေမယ့် တဘက်ကလည်း ဟီးရိုးဖြစ်နေတတ်ပါတယ်။ ဒါပေမယ့် ဟီးရိုးလည်း မဖြစ်ချင်ပါဘူး။ အများစုသော ဗီလိန်တွေက ကိုယ်လိုချင်တာအတွက် နာမည်ဆိုးချင် ဆိုးပါစေ ရအောင်ယူတတ်တဲ့ စိတ်ဓာတ်ရှိတာကြောင့် လူ ဆိုတာ အတ္တသားပါပဲ ဆိုတာကို ဟန်ဆောင်မှုကင်းစွာ သရုပ်ဖော်ထားတဲ့ ပြယုဒ် တစ်ခုပဲလေ။ ကိုယ့်အတ္တ၊ ကိုယ့်ယုံကြည်ချက်အတွက် ခိုင်မာတဲ့ ပန်းတိုင်တစ်ခုတည်းပဲ ရှိပြီး ဘယ်အရာကိုမှ ဂရုမစိုက်တတ်တဲ့............ ဗီလိန် ဆိုတာကို ကျနော့ရဲ့ ကလောင်အဖြစ် ဘာကြောင့် မြတ်နိုးစွာ ရွေးချယ်ခဲ့သလဲ ဆိုတာ စာဖတ်သူတို့ သိနိုင်ပါစေ။

ဗီလိန်ရဲ့ အိပ်ရာ ဆိုတဲ့ ဘလော့ခေါင်းစဉ် အကြောင်းကိုတော့ ဒီနေရာမှာ သွားရောက် ဖတ်ရှုနိုင်ပါတယ်။

ဖိုးဂျယ်ရေ့ တဂ်ကြွေးလေး ရှင်းရင်းနဲ့ တခါတည်းပဲ နှုတ်ဆက်ပါတယ်။ အမိမြေကနေ ဆက်ရေးဖို့လည်း တိုက်တွန်းပါတယ်။
ကိုမင်းအိမ်ဖြူ ကိုလည်း နောက်ဆိုအားမနာပါနဲ့လို့ ပြောချင်ပါတယ်။ သက်သက်လွတ် ကြာဆံကြော်တော့ ကျွေးပေါ့။ :)

ဗီလိန်

ကိုအင်ဒီ၊ မရွှေပြည်သူ နဲ့ ကိုခရောင်း ရေ့........... ဒန့်တန့်တန့်

6 comments:

မင်းအိမ်ဖြူ said...: ကျေးဇူးပါ
အမှန်တကယ် ချီးကျူးပါတယ်
လေးစားပါတယ် ... ရင်တွင်းစကားပါ
ပျော်ရွှင်ပါစေ

အမှားနဲ.ပတ်သပ်လို. ဆရာတော်ရဲ့ဆုံးမစကားလေး ထည့် ပေးထားတာ ပိုမြှောက်သွားပါတယ်...; Jun 2, 2009, 12:19:00 PM
JulyDream said...: ဗီလိန်ရဲ့ အိပ်ရာကို လာလည်ပါတယ်။ ကြမ်းပိုး မရှိအောင်တော့ လုပ်ထားဗျာ။ တော်ကြာ ကြမ်းပိုးတွေ ကပ်ပါလာရင် နောက်ဆို လာ မလည်တော့ဘူး။ =)

မှတ်ချက်။ စလုံးမှာ တကယ် ကြမ်းပိုးပေါတယ်။ ပိုးစိုးပက်စတ် စိတ်လေတယ်။; Jun 2, 2009, 4:47:00 PM
ဖိုးဂျယ် said...: အေး သူငယ်ချင်း မင်း နာမည်ရဲ့
အဓိပ္ပာယ်ကတော့ ကိုယ်တိုင်နားလည်တဲ့
ရင်တွင်း ခံစားချက်လို့ပြောရမယ်။
မပြောပြတတ်ပေမဲ့ နားလည်တယ်ကွာ
ငါလဲ ရွှေပြည်ကြီးကနေ ကြိုးစားရေးမယ်ကွာ။
မင်းလဲ အဆင်ပြေပါစေကွာ

မင်းရဲ့ ချစ်သယ်ရင်း
ဖိုးဂျယ်; Jun 4, 2009, 9:55:00 AM
Anonymous said...: ထို့ကြောင့် ဗီလိန်ဟုခေါ်သည်..............။; Jun 5, 2009, 5:57:00 PM
အောင်ဒီကန် said...: ဖွင့်ဆိုချက်ကတော့ ပြောင်မြောက်တယ်ဗျို့။ အောက်ဆုံးက ကိုအင်ဒီ၊ မရွှေပြည်သူ နဲ့ ကိုခရောင်း ရေ့........... ဒန့်တန့်တန့် ဆိုတာကတော့ ..... :(
လာတော့လာမယ်ပေါ့; Jun 8, 2009, 2:47:00 PM
ဗန်ပိုင်းယား said...: လွယ်သလား ခက်သလား ရာမ ...; Jun 11, 2009, 2:11:00 PM